Хог хаягдал

Хог хаягдал гэж ер нь юу юм бэ гэж бодсон бараг бүх зүйл хог хаягдал биш үү гэсэн сонин бодол надад орж ирэв. Бүгд л хүний хэрэглээнээс гаралтай. Англид өдөр тутам гарч байгаа хог оо зориулалтын 5 ялгаатай саванд хийнэ, төмөр лааз, хуванцар болон шилэн савыг угааж цэвэрлээд холбогдох хогийн саванд хийдэг. 

Англи улсад үйлдвэрлэсэн бүтээгдэхүүний сав баглаа боодол дээр дахин боловсруулах, боловсруулж магад, хогт хийж болохгүй, дахин боловсруулахгүй гэх мэтээр стандарт лого тэмдгийг тавьсан байх тул өдөр тутмын хэрэглээгээр гарч байгаа хаягдал зориулалтын саванд хийх нь төвөггүй  байдаг. Хот, орон нутгийн захиргаа тухайн нутагтаа боловсруулж чадах эсвэл цуглуулж зөөвөрлөх боломжтой хог хаягдлыг зөвлөмжийн дагуу савласныг долоо хоногийн тогтсон өдөр 2-3 төрөл хогийг зориулалтын машинд ачиж явна. 

Их Британи улс нь 102 каунты буюу монголоор бол аймагтай, аймаг тус бүр өөрсдийн захиргааны дүрэм журмаар орон нутгийнхаа хог хаягдлыг зайлуулах боловсруулах үйл ажилгаагаа зохицуулна.

Өдөр тутамд хэрэглээнээс гарах хог хаягдлыг дээрх аргаар шийдвэрлэдэг бол овор хэмжээ том дахин боловсруулах хогийг зориулалтын төвлөрүүлсэн хаягдал цуглуулах төвүүдэд иргэд өөрсдөө хүргэж өгнө. Мөн том супермаркетын дэргэд дахин боловсруулах хогийг цуглуулах цэгийг байрлуулж  иргэд өөрсдөө хүргэж зориулалтын саванд өөрсдөө хийнэ. Ийм цэгүүд хот бүрд нэгээс эхлээд хэд хэд байна.

Дахин боловсруулах хаягдал цуглуулах төвд хаягдал аа ялгаж хаяна, жишээ нь төмрийн хаягдал, модны хаягдал, машины дугуйны хаягдал, хуучин ТВ, компьютер гээд электрон тоног төхөөрөмжийн хаягдал, цаас хайрцаг, шил, барилгын хаягдал материал гэх мэт олон янзаар иргэд өөрсдөө ялгаж том контенорт хийж хаядаг. 

Англид үйлдвэрлэсэн бүтээгдхүүний савалгаа, боолт дээр ямар лого тэмдгүүд байдгийг дээрх зурагт харуулсан байна. Үүнд : 

1. Хаана ч дахин боловсруулна. Хаягдал дахин боловсруулах аль ч саванд хийж болно. 

2.  Энэ илүү нарын мэдээлэлтэй логонууд. 

• Эхнийх нь хүнсний цаасан хайрцгууд дахин боловсруулна. 
• Хар өнгийн хуванцар сав зарим орон нутагт боловсруулалтад авч чадаагүй байгаа тул орон нутгийн зөвлөмжөөс үз гэсэн тэмдэг. 
• Хөндлөн зураастай лого тэмдгээр гялгар уут, төстэй материалууд одоогоор дахин боловсруулж чадахгүй тул ерөнхий хогт хий.

3. Заримдаа ийм логог хэрэглэсэн, голд нь хэдэн % ийг дахин боловсруулж болохыг заадаг байна. Орон нутгийн зөвлөмжөөс лавлан харж мэдэж болно.

4. Могой шиг ногоон лого нь дахин боловсруулах агуулгыг илэрхийлэхгүй бөгөөд байгууллага ийм лого тэмдэгтэй, бүтээгдэхүүн ийм лого тэмдэгтэй бол тус байгууллага дэлхийн хаа нэгтэй дахин боловсруулах арга хэмжээнд санхүүгийн хандив оруулсныг илэрхийлдэг байна.

5. Орчин үед дахин боловсруулалтад орохгүй, хэсэг хугацааны дараа устаж хөрсөнд болон ургамалд тэжээл болох шинэ материалыг гаргаж уут сав боох материал болгож хэрэглэж эхэлсэн. Ийм лого тэмдэгтэй хаягдлыг навч ногоо, мөчир гээд ургамлын гаралтай хог хийх саванд хийнэ.

6. Эндхийн хэрэглээнд олон төрөл хуванцар байна, түүнийг танихад хэрэглэнэ. Ихэнх хуванцар нийлэг эд дахин боловсруулалтад ордог ч дахин боловсруулалтад ордоггүй төрөл хэд хэд байдаг. Үүнийг интернетээс дэлгэрүүлэн үзэж болно. 

Энэ мэтээр хөнгөн цагаан гэх мэт төмрийн хаягдлыг ч таних тэмдгүүд байдаг байна.

Хот, хөдөө орон нутагт өөрсдийн захиргаанд бүртгэлтэй бүх айлд

• Хогийн савнууд,
• Ямар саванд ямар хог хийх тухай мэдээлэл,
• Хэдний өдөр хэдэн цагт ямар хог хаягдлыг ачиж авч явах  

мэдээллийг хүргэж өгдөг. Үүний жишээг дээрх зургаар үзүүллээ. Дөрөвдөх өдөр бүр ямар хогийг ачих тухай улаан, хөх, цагаан өнгөөр ялгаж тэмдэглэсэн, таван төрлийн хогийн саванд ямар хог оо хийх үү, ямар хог хийж болохгүй хэлж өгч ээ. Миний ажигласнаар супермаркед бүрт орох гарах хаалганы орчим хэрэглээд дууссан зайг цуглуулж авах сав ил тавьсан байдаг. Хэрэглээгүй үлдсэн эмийг авсан эмийн санд нь хүргэж өгөөд устгуулах боломжтой байдаг. 

Энэ нь Англид амьдарч буй бүх иргэдийн өдөр тутамдаа мэдэж хэрэгжүүлдэг амьдралын хэвийн үзэгдэл. Энэ бүгдээс санаа оноо олж монголынхоо нөхцөлд тохируулж амьдралд хэрэгжүүлээсээ гэж бодож бичлээ.